揀啱嘅底妝產品係靚妝嘅基礎，唔止可以遮到皮膚啲瑕玼，仲可以提升面色，為之後嘅彩妝步驟做好準備。今集就同大家一齊認識下底妝家族嘅成員啦！

🌟妝前打底類

▎妝前乳 (Primer)

主要成分：通常有保濕成分（如甘油、透明質酸）、矽類成分，有啲產品仲加咗控油同修飾嘅成分，可以幫手令皮膚滑啲、控油保濕、令之後嘅妝容更加持久。

適用場景：妝前乳係護膚之後、底妝之前嗰個步驟，乾性皮膚可以揀保濕型，油性皮膚揀控油型。

編輯部嚴選：HOURGLASS Veil Mineral Primer妝前乳

美國加州彩妝品牌Hourglass，主張純素及零殘忍美容，品牌推出嘅呢款妝前乳，真係功能多多，不單止可以遮蓋發紅、隱藏毛孔，仲可以柔化細紋同皺紋，同時保護你嘅皮膚免受陽光傷害。質地滑捋捋又輕盈，幫你打造完美肌底，為無瑕妝容做好準備。

▎隔離霜 (Makeup Base)

核心成分：通常有保濕劑同矽類成分，可能添加防曬成分（物理或者化學防曬劑）、色素、抗氧化劑（如維他命C同E），一齊幫手抵抗環境傷害。

主要功能：隔離霜可以形成一層屏障，防止污染同紫外線傷害皮膚，同時提升粉底等化妝品嘅附著力，有啲有色隔離霜仲可以修正膚色同遮瑕，有啲仲有防曬效果。

編輯部嚴選：RMK 原生光感隔離霜

日系品牌RMK嘅隔離霜，可以大幅提升你嘅素肌質素，令皮膚持久水潤，提升粉底嘅貼服度同效果。利用光線修飾膚色暗沉同色斑，仲有SPF22 PA++防曬效果，加埋兩種易於融入皮膚同粉底嘅油成分，幫你實現高級感嘅原生光感底妝。

🌟基礎粉底類

▎粉底液 (Liquid Foundation)

粉底液係液體嘅底妝產品，質地薄，啱日常用。佢可以均勻膚色，遮瑕，同埋提供好強嘅遮瑕效果。粉底液配方多樣，可按自己嘅膚色揀啱唔同色號，亦可以根據自己需要揀控油型、保濕型、持久型嘅粉底液，適合各類型膚質。

編輯部嚴選：LANCÔME 持妝輕透粉底液

LANCÔME呢款粉底液可以畀你24小時嘅持久妝效，打造出零負擔感嘅啞緻妝容。佢有平衡控油同光澤嘅持妝配方，仲有專利持妝透氣網膜技術，可以立體鎖妝。敏感肌都用得，因為佢首次復配81%嘅護膚基底配方，入面有辣木籽油、透明質酸同維他命E等成分，仲加咗可以揮發嘅輕質油，令粉體更加均勻貼服。

▎粉底霜 (Cream Foundation)

粉底霜就比粉底液杰身啲，通常有更多滋潤成分，啱乾性或者成熟皮膚用。佢嘅遮瑕效果強啲，可以有效遮到明顯嘅瑕玼同唔勻勻嘅膚色，最啱需要長時間上妝嘅場合，如正式活動或者晚宴。

編輯部嚴選：KANEBO原生活力精華粉底霜

日本品牌KANEBO呢款粉底霜用咗全新嘅活力美肌技術，可以修飾皮膚同時保留原生皮膚嘅光澤、紋理同色彩，重現素肌質感。入面有保濕成分「保濕精華複合物」，可以舒服咁喺皮膚上延展，成日保持皮膚水潤。佢零厚重感，軟熟嘅啫喱狀塗膜能有效防止溶妝，令皮膚長時間保持光澤。

▎氣墊粉底 (Cushion Compact)

氣墊粉底係一種方便帶嘅底妝產品，通常包裝喺氣墊盒入面，隨時可以補妝。佢質地薄，可以造出自然嘅妝效，啱日常或者休閒場合。氣墊粉底一般都有保濕成分，令妝容睇落水潤。揀氣墊粉底嗰陣，可以考慮佢嘅防曬效果同持妝時間，去滿足日常需要。

編輯部嚴選：ESTĒE LAUDER 持久輕透柔霧氣墊粉底

呢款ESTĒE LAUDER嘅氣墊粉底，通過雙重護理，造出空氣感柔霧妝效。一抹就可以修護皮膚，同時遮瑕同遮毛孔，鎖住皮膚水分，令粉底持久貼服。同時利用光學粒子反射同散射光線，呈現立體細膩膚質。佢嘅薄身輕盈液態粉末配方，接觸皮膚後會變粉狀定型，有效遮蓋同淡化毛孔同瑕玼，令妝感好似第二層皮膚咁貼服自然。

▎粉餅 (Pressed Powder)

粉餅就係一種壓縮粉末，主要用嚟定妝或者輕微修飾。佢可以吸收皮膚多餘嘅油粉，保持妝容清爽，最啱快速補妝使用。粉餅嘅遮瑕效果通常比較輕，最啱只需要輕度遮瑕嘅日常妝容。揀粉餅嗰陣，可以根據自己膚色同妝效需要去選擇透明型或者有色粉餅。

編輯部嚴選：Charlotte Tilbury 輕盈無瑕蜜粉

呢款Charlotte Tilbury嘅蜜粉，粉質輕盈，妝感幼滑，輕輕一掃就可以即刻柔化皮膚瑕玼，撫平細紋，好似幫皮膚加咗層無瑕濾鏡咁。佢嘅細滑粉質可以令你嘅妝容更加持久同完美，係你打造無瑕妝容嘅最佳選擇。

🤩靚妝大揭秘：你問我答Q&A

Q1：妝前乳同隔離霜有乜分別？

A：妝前乳主要係改善妝感同令皮膚滑啲，通常有更多矽同保濕成分；隔離霜就主要係防曬同保護皮膚，有更多防曬成分同色彩校正功能。

Q2：妝前乳同隔離霜係咪一定要一齊用？

A：唔一定，睇你嘅妝容需要同皮膚狀態。如果你想之後嘅底妝貼啲同持久啲，可以淨係用妝前乳；如果你想保護皮膚，可以淨係用隔離霜。如果兩樣一齊用，記住要控制用量，唔好太厚，唔係會影響之後上妝。

Q3：今期產品用嘅次序應該係點喔👉👈？

A：視乎你用嘅妝前乳種類。

如果你用嘅係保濕型或者透明嘅妝前乳，用嘅次序就會係: (保濕/透明)妝前乳-->防曬-->隔離霜-->粉底，然後先至做其他化妝步驟。

如果係有色嘅妝前乳，就要喺防曬之後用, 用嘅次序就會係: 防曬-->有色妝前乳-->隔離霜-->粉底，然後先至做其他化妝步驟。

Q4：用咗有防曬成分嘅隔離／粉底，仲使唔使額外用防曬產品？

A：妝前同底妝產品有啲防曬成分，可以應付日常同室內環境。但係如果你要去户外活動或者要面對強光環境，記得要用多啲專業防曬產品同埋要及時補塗。

Q5: 粉餅可唔可以單獨做底妝用？

A：粉餅分為底妝粉餅同定妝粉餅。底妝粉餅可以單獨用嚟做底妝，而定妝粉餅（蜜粉餅）通常用嚟定妝。用完底妝粉餅之後，如果你想個妝持久啲，可以用定妝噴霧嚟定妝。

睇完呢篇，相信你已經識得點揀底妝產品啦，想令無瑕底妝更加持久？不如重温下定妝篇，令到妝容靚靚又持久！大家有咩美妝問題疑難，或者有話題想知多D，歡迎whatsapp inbox話我地知，等大家一齊分享下，LANGHAM BEAUTY網店爲你搜羅城中熱賣新品同各款精選優惠， 記住緊貼各項網店資訊優惠啦，同大家一齊look good, feel great!